ជំនន់ទឹកភ្លៀងលិចផ្លូវជាតិលេខ៤ ត្រង់ស្ពាន​សំរោង ​ស្រុកកំពង់សីលាស្រកចុះអស់ពីផ្លូវ អាជ្ញាធរអនុញ្ញាតឲ្យរថយន្តតូចធ្វើចរាចរណ៍បាន ប៉ុន្តែរថយន្តធុនធំនៅតែហាមឃាត់

(ព្រះសីហនុ)៖ ស្នងការនគរបាលខេត្តព្រះសីហនុ លោកឧត្តមសេនីយ៍ទោ ជួន ណារិន្ទ បានថ្លែងប្រាប់បណ្ដាញព័ត៌មាន Fresh News ឲ្យដឹងថា គិតរហូតមកដល់ព្រឹកថ្ងៃទី១៨ ខែកញ្ញា ឆ្នាំ២០១៨នេះ ស្ថានភាពទឹកជន់លិចផ្លូវជាតិលេខ៤ ត្រង់​ចំណុចស្ពានសំរោង ស្ថិតក្នុងឃុំអូរបាក់រទេះ ស្រុកកំពង់សីលា ខេត្តព្រះសីហនុ បានស្រកអស់ពីផ្លូវជាតិហើយ ដោយអាជ្ញាធរសម្រេចបើកឲ្យរថយន្តតូចៗធ្វើចរាចណ៍ឆ្លងកាត់បាន ប៉ុន្តែចំពោះរថយន្តធុនធំមិនអនុញ្ញាតឡើយ ដោយតម្រូវឲ្យបើកផ្លូវវាងទៅផ្លូវជាតិលេខ៣។

សូមជម្រាបថា ក្រសួងធនធានទឹក និងឧតុនិយម បានចេញសេចក្ដីជូនដំណឹង ពីការព្យាករណ៍​អាកាសធាតុ នៅប្រទេសកម្ពុជាដោយបញ្ជាក់ថា ភ្លៀងនឹងធ្លាក់រាយប៉ាយពីមធ្យមទៅច្រើន ក្នុងក្របខ័ណ្ឌទូទាំងប្រទេសកម្ពុជា ចាប់ពីថ្ងៃនេះ រហូតដល់ថ្ងៃទី១៩ ខែកញ្ញា ឆ្នាំ២០១៨ បណ្ដាលមកពីឥទ្ធិពលនៃព្យុះទី២២ ឈ្មោះ មង្ឃុត និងព្យុះទី២៣ ឈ្មោះ បារីចាត៕ប្រភព: Freshnews